بیٹھ کراشارے سے نماز اس طرح پڑھی کہ رکوع و سجود میں ایک جیسا ہی جھکا تو کیا نماز ہو گئی

 کیا فرماتے ہیں علمائے کرام اس مسئلہ کے بارے میں کہ  بیٹھ کراشارے سے نماز اس طرح پڑھی کہ رکوع و سجود میں ایک جیسا ہی جھکا تو کیا نماز ہو گئی؟

بسم اللہ الرحمن الرحیم                                                                   

الجواب بعون الملک الوھاب  اللھم  ھدایۃ الحق وا لصواب                                      

صورت مسئولہ میں نماز نہ ہوئی۔اشارے سے نماز پڑھتے ہوئے حکم ہے کہ سجدے میں رکوع سے زیادہ جھکے،ورنہ نماز نہ ہوگی۔

درمختار میں ہے۔

’’(وان تعذرا)لیس تعذرھما شرطا بل تعذر السجود کاف لا القیام  (أومأ قاعدا) وھو أفضل من الایماء قائماً لقربہ من الارض (و یجعل  سجودہ أخفض من  رکوعہ )لزوماً (والا) یخفض(لا)یصح لعدم الایماء‘‘

 یعنی اگر قیام وسجود متعذر(مشکل) ہو جائیں،دونوں کامتعذر ہونا شرط نہیں ہے بلکہ سجدوں کا متعذر ہونا ہی کافی ہے نہ کہ قیام کا،تو بیٹھ کر اشارے سے نما ز پڑھے اور اس صورت میں کھڑے ہونے کے بجائے بیٹھ کر نماز پڑھنا افضل ہے کیونکہ بیٹھنے میں زمین سے زیادہ قریب ہوگا اور سجدوں  میں رکوع کی بنسبت زیادہ جھکنا لازمی ہے اور اگر   سجدوں میں زیادہ نہ جھکاتو اشارہ نہ پائے جانے کی وجہ سے نماز نہیں           ہوگی۔“ 

(الدرالمختار ،جلد2،صفحہ685،684،کوئٹہ)  

                              

   واللہ اعلم ورسولہ اعلم                                                                             

کتبہ۔ المتخصص فی الفقہ کامران رضامدنی                                                           

x